សៀមរាប៖ ភ្ញៀវទេសចរជិត៨ពាន់នាក់ បានចូលមកទស្សនាសួនរុក្ខជាតិអង្គរនៅថ្ងៃទី២២ ខែឧសភា ឆ្នាំ២០២២ ក្រោយពេលសួននេះបានដាក់សម្ភោធដាក់ឱ្យដំណើរការជាផ្លូវការកាលពីថ្ងៃទី១៩ ខែឧសភា ឆ្នាំ២០២២កន្លងទៅ។ នេះបើតាមការឲ្យដឹងរបស់អាជ្ញាធរជាតិអប្សរា។
អាជ្ញាធរអប្សរាឱ្យដឹងថាភ្ញៀវទេសចរដែលបានចូលទស្សនាសួនរុក្ខជាតិអង្គរមាន ៧ ៧១៥នាក់ ក្នុងនោះភ្ញៀវជាតិចំនួន ៧ ៦៦៤នាក់ និងភ្ញៀវបរទេសចំនួន៥១នាក់ ភាគច្រើនបានបង្ហាញក្តីសប្បាយរីករាយ នូវពេលមកទស្សនា។
ប្រជាពលរដ្ឋដែលទៅទស្សនាបានឱ្យដឹងថា សួននេះមានទីធ្លាធំទូលាយ និងមានប្រភេទរុក្ខជាតិកម្រៗជាច្រើនប្រភេទ ដែលភាគច្រើនគេមិនធ្លាប់ឃើញពីមុនមក។
សួនរុក្ខជាតិអង្គរ មានភាពទាក់ទាញដោយសារការរៀបចំសួនក្នុងរចនាបទខ្មែរ មានធម្មជាតិស្រស់បំព្រង ផ្ការីកស្គុះស្គាយចោលក្លិនក្រអូប ធ្វើឱ្យអ្នកទេសមកទស្សនាមិនចេះជិនណាយ។
សួនរុក្ខជាតិអង្គរ បានក្លាយជាសមិទ្ធផលទេសចរថ្មីមួយទៀត នៅក្នុងក្រុងសៀមរាប ដែលអាជ្ញាធរជាតិអប្សរាបានបង្កើតឡើង ដោយមានដាំរុក្ខជាតិចម្រុះរាប់ម៉ឺនដើម នៃពូជជាង៥០០ប្រភេទ ដូចជាដើមផ្កា ស្មៅ ឈើហូបផ្លែ។
គេអាចចាត់ទុកថា ជាសួនមានលក្ខណៈពិសេសលើសសួនកំសាន្តដទៃទៀតនៅក្នុងប្រទេសកម្ពុជា ដោយសារតែសួននេះ ស្ថិតក្នុងរចនាបទបែបខ្មែរ មានដាំបន្លែចម្រុះជាច្រើនមុខ មានសួនរុក្ខជាតិធ្វើឱសថ សួនគ្រឿងទេស សួនអំបូរត្នោត សួនលំនៅដ្ឋានខ្មែរ សួនព្រៃឈើនិងបន្ថែមលើនេះ ក៏មានសួនសត្វជាច្រើនប្រភេទ ដូចជាអណ្តើក ក្ងោក ព្រាប ទន្សាយ និងសត្វស្លាបប្រវាំងជាដើម៕
